Oħroġ il-potenzjal tal-ideat tiegħek!

Matul il-konsultazzjonijiet maż-żgħażagħ tal-Konferenza dwar il-Futur tal-Ewropa, aktar minn 1,500 proposta taż-żgħażagħ inġabru fuq youthideas.eu u saħansitra aktar ġew kondiviżi fuq  futureu.europa.eu. L-Avveniment Ewropew taż-Żgħażagħ 2021, li sar fi Strasburgu f'Ottubru, kien stadju importanti f'dan il-proċess ta' ġbir ta' ideat. Kien organizzat bħala parti mill-Konferenza dwar il-Futur tal-Ewropa, u r-riżultat tiegħu kien ir-Rapport dwar l-Ideat taż-Żgħażagħ. Dan ir-rapport fih l-20 idea bl-akbar impatt żviluppati miż-żgħażagħ fl-avveniment u jippreżentahom lil min jieħu d-deċiżjonijiet. M'hemm l-ebda dubju li l-ġenerazzjoni żagħżugħa tal-UE hija ħerqana li ssawwar il-futur!

Allura, ġbarna l-ideat. Imma mbagħad x'ġara?

• Eżatt wara l-EYE, ir-Rapport dwar l-Ideat taż-Żgħażagħ ġie ppreżentat lill-Plenarja tal-Konferenza u ġie diskuss mal-Membri tal-Parlament Ewropew (ara EYE Online).
• L-ideat imbagħad ġew diskussi aktar fid-dettall fil-Parlament Ewropew, b'dibattiti dwar suġġetti bħad-demokrazija u l-valuri, l-edukazzjoni, il-multilingwiżmu u l-ekonomija.
• U ma waqafniex hemm. Dawk l-ideat ġew enfasizzati u diskussi minn membri oħra tal-Konferenza fid-dibattiti tagħhom u ġew żviluppati fi gruppi differenti involuti/sessjonijiet fil-Konferenza.

Għadek qed taħsibha biex taqsam magħna l-ideat tiegħek dwar il-Futur tal-Ewropa? Forsi xi ħsibijiet mit-tim editorjali tar-Rapport dwar l-Ideat taż-Żgħażagħ – żgħażagħ li kienu qed janalizzaw is-suġġerimenti ppreżentati kollha – se jbiddlulek fehmtek:

"L-ewwel pass hu li toħroġ b'ideat, proposti u soluzzjonijiet ġodda. Irridu niddibattu u niddiskutu dawn l-ideat mal-mexxejja u l-politiċi tagħna fil-panels taċ-ċittadini, f'dibattiti u f'konsultazzjonijiet. Il-mexxejja Ewropej tagħna wkoll għandhom jinżammu responsabbli u jkollhom il-kompitu li jwasslu dawn l-ideat fi ċrieki politiċi. Ix-xogħol ta' vera għad irid jibda." - Niamh, Kap Editur tar-Rapport dwar l-Ideat taż-Żgħażagħ

"Li tpoġġi fi kliem l-ideat politiċi għal futur aħjar jaf ikun proċess pjuttost astratt: Għalhekk, issa huwa importanti aktar minn qatt qabel li aħna ż-żgħażagħ nippreżentaw l-ideat tagħna lil min ifassal il-politika u niddiskutu direttament miegħu kif dawn l-ideat jistgħu jiġu implimentati." - Marie, Kap Editur tar-Rapport dwar l-Ideat taż-Żgħażagħ

Huwa importanti li jkollna proċessi ċentralizzati biex naqsmu u nsegwu l-ideat fuq livell Ewropew. Tissottovalutax l-impatt li jista' jkollok fuq il-komunità tiegħek u iġġieled għal dak li temmen fih! Tista' tagħmel ħafna fiż-żona lokali tiegħek u f'pajjiżek. Il-bidliet li l-aktar jaffettwawlek ħajtek huma spiss dawk li jsiru fejn tgħix, fil-komunità tiegħek.